Lelagon paringane ibu

WELINGKU
Welingku ngger- angger ,mumpung durung kadalarung marenana ngger angger,
Luwih ala, luwih ala melik darbeke wong liya .........................
(Bahasa Indonesianya :pesan saya ya nak, sebelum terjerumus hentikan ya nak, perbuatan yang tercela jika ingin memiliki barang orang lain)

Lelagon ing dhuwur diparingi ibu nalika aku isih cilik, kira-kira kelas
3(telu)SD. Aku apal banget amarga tembunge kang gampang lan anggone nuturi
karo dilagokake.Ibu ngelingake aja sok seneng njupuk duweke wong liya.Amarga aku isih ana SD, aja seneng jupuk bukune kanca, grip, sabak,kapur lan liya-liyane,iku tumindak sing kurang apik lan banget nistha. Bareng aku wis dadi guru lelagon mau dak terusne marang muridku, mung wae anggonku nuturi ora ndaklagokake. Saupama ana murid lan kebeneran bocah mau wong tuwane mampu,nanging seneng nyilih ora ngomong karo sing duwe, mesthi dak sindhir:mosok cah,bolpen wae nyilih ...... mosok cah arep tuku potlot nganti dodol omah....
Yen wis ngono lagi gelem tuku dhewe, lan aku ora bosen-bosen terus ngelingake aja seneng nyilih,aja seneng jupuk barange kancane....... bisa kebablasen.Wiwitane bulpen, potlot, garisan,stipo.....nanging yen dijarne bisa njupuk barang sing luwih pengaji malah bisa-bisa dhuwit, arloji,kalkulatore kancane ya disaut ......piye yen ngene iki?

Nembang Panembrama

WIS DAK NIYATI
Catetan nalika mahargya pameran pendidikan .........

Rabu tanggal 13Mei 2009,aku sakanca ngisi acara pembukaan pameran Sekolah Kejuruan sing dianakake Dinas Pendidikan Surabaya, manggon ing dalan Pemuda Surabaya.Sadurunge tampil wis latihan kanthi mateng ya pangrawite ya panembranane kanthi tujuwan ora nguciwani ing ngarepe para priyagung dinas pendidikan.Aku bungah dene diwenehi kalonggaran kanggo mamerake kabisane.Esuk iki aku semangat banget kabeh samubarang wis dak tata malah wingi bengi wis sinau nganggo nyamping karo pak Sugeng mitra raketku.Mantan pacar ngelikake, ora sah kesusu paling-paling jam 9 acara diwiwiti wis hebat. Aku ora mikir samono bah jam 9 apa jam 10 diwiwiti ora dak reken pokoke ndang enggal budhal salin ing kana, menganggo beskap blangkonan ,selopan ....dadi wong Jawa tenan(apa wingi ora Jawa ?).Temenan tekan dalan Pemuda wis wiwit ana greget yen dina iku ana kegiatan malah ibu-ibu kanca basa Jawa ya wis ana sawetara sing rawuh ngagem kebayak.Ibu-ibu pangrawit agemane abang sing panembrama agemane biru. Abang karo biru apa sida koalisi ya.... ah kok nglantur .
Jam 08.30 kabeh wis siyap kanggo latihan nyocogake kahanan lan papan,manut aba-abane sing nglatih pak Djumiran lan pak Warsito saka SMK 9 Surabaya. Cekaking crita jam 11.00 aku sakanca sida tampil kanthi lamncar. Kanggo nyingkat wektu lan lancare pameran Sekolah Kejuruan,amarga acara saka panitia akeh upamane pengguntingan pita ,tindak mirsani stand Sekolah Kejuruan lsp, aku sakanca nembang Kinanthi 3 pada senggakan 3 pada ,dene bawa lan lagu jamu-jamu ora ditembanganke ..... Alhamdulillah. Ora duwe rasa gela,ora duwe rasa kuciwa.... wis padha diniyati....pancen wis dak niyati, ora ketang ngadeg mung sedhela .....
...sanajan sakedheping mata kanggo tamba kangen jroning dhadha
...sanajan wektu mung sedhela kanggo tamba kangen jroning dhadha(lagu Didi Kempot)
nuwun
,

Pitutur mantan murid

APA AKU WIS .........
Aku wis lali wulan lan tanggale, yen ora kliru beneri pasa wulan Oktober 2008. E... mbok manawa ana gunane tulisan iki...Sore iku aku tuku soto ing langganan.Biasa saben mantan pacar ora masak amarga kesel momong putu, aku sing kebagean golek iwake. Nalika tuku soto,ketemu mantan muridku SMA Ta'miriyah Surabaya tahun 80an. Aku ora lali jenenge awit muridku mau kalebu istimewa, embuh ing endi istimewane.
"Assalamu alaikum " ngono sapane .
"Waalaikum salam, sik ta awakmu lan Nurwakib? Apa isih nyopir lyn Wl(Wonosari-Pasar loak Surabaya).
"Inggih pak, kula Nurwakib, ayo nak salim iki gurune bapak biyen" ngono karo nyalimke tangane anake, lan dak tampani.
"Wadhuh, ganthenge, kelas pira iki ?
"Kelas tiga, anu kok pak kula mboten boten nyopir malih samenika inggih nyabut damel sawontenipun pokokipun halal "
"Iya bener iku , yen halal insya Allah barokah lan bakal lancar samubarange "
"Inggih, dospundi pak kabaripun guru-guru kula ?
"Aku ya ora pati srawung wong aku wis metu saka Ta'miriyah.Kabar sing dak krungu pak Husnan wis seda, pak Fakih wis seda, pak Imam Mahdi wis seda pak Ahyar olahraga ya wis seda embuh liyane, saiki kepala sekolahe yen ora salah pak Munif Munsyarif"
"Inggih ,kula boten badhe kesupen dhateng guru -guru kula,saben malem Jum'at kula waosaken Yasin kangge guru-guru ingkang sampun seda, lan guru ingkang sugeng mugi-mugi pinaringan seger kewarasan .Sampun pak kepareng, menika sotonipun sampun kula bayar ...assalamu alaikum ...
".....Waalaikum salam......Dheg atiku kaya diosikake, dadi aku iki seprana-seprene nganti dadi guru durung bisa nyaosi apa-apa karo bapa guru sing minterake aku kok asor banget budiku , apa aku wis.....donga ....maca yasin marang guru sing wis seda .....apa bales budimu ....... utang dhuwit bisa dibayar ....utang budi...nganti mati ora bakal lali....dhuh Gusti Allah .....ya wis matur nuwun Nurwakib muga-muga anggonmu golek sandhang pangan bisa lancar lan anakmu bisa migunani kanggo nusa bangsa agama selaras karo kekudangane wong tuwa....amin , aku njur kelingan tembang gambuh bab pitutur

pitutur bener iku
samesthine apantes tiniru
nadyan metu saking wong sudra papeki
lamun becik nggone muruk
iku pantes sira anggo

Materi ujian sekolah

MATERI UJIAN SEKOLAH BASA JAWA
Murid-muridku iki materine ujian sekolah sing kudu disinaoni.
A.Crita wayang lan cita rakyat
-Laire Werkudara
-Pandhawa lan Korawa
-Abimanyu kerem
-Jaka Kendhil
-Prabu Anglingdarma
B.Unggah-ungguh basa
-Basa krama
-Basa ngoko andhap
-Basa ngoko lugu
C.Kawruh basa
-Tembung entar
-Tembung andhahan
-Tembung jarwan
D.Aksara Jawa lan angka Jawa
E.Karya sastra
-Geguritan
-Tembang macapat lan tembang dolanan
F.Artikel panggonan wisata
F.Teks pidato

Panembrama dinten Pendidikan Nasional ing Sby

Teks ing ngandhap punika angsal nalika kula pelatihan tembang dinten Sabtu ,25 April 2009, wonten ing SMK 9 Surabaya ingkang nglatih bapak Djumiran,RA.

PANEMBRAMA DINTEN PENDIDIKAN NASIONAL
ING KITHA SURABAYA.

Bawa sekar Pangkur Plg Nem
===========================
Menggah dinten Pendidikan
Pinengetan guru lan siswa -siswi
sesantining sarjana gung
Ki Hajar Dewantara
ing ngarsa sung tuladha tujuwanipun
ing madya amangun karsa
tut ing wuri handayani

Senggakan
Puji sukur kunjuk maring Maha Luhur, awit berkah kang tumerah ing pratitah
aja lali sungkem sembah kunjuk Gusti,Maha Suci ingkang tansah anyekapi

Kinanthi Gandamastuti Plg.Nem
=============================
Atur sugeng rawuhipun
amba guru Basa Jawi
saking kitha Surabaya
sung pambagyarja basuki
Den samya sekeca lenggah
ngantos paripurneng gati

Senggakan 2
Kembang mlathi tinandur tepining kali,
ngati-ati nastiti murih basuki
kembang menur tinandur tepining sumur
miyar-miyur atine wong ora jujur.

Kinanthi 2.
Piwulange para guru
dhateng siswa-siswi sami
datanpa ngetung rekasa
cerdhasing bangsa linuwih
temah luhur budinira
bangsa Indonesia yekti

Senggakan 3
Kembang randhu rinujak rasane langu
dadi guru aja ragu nyebar ngelmu
kembang nangka,rinujak rasane sepa
dadi siswa ja sembrana sing waspada

Kinanthi 3
Siswa guru bareng maju
sengkut nindakake wajib
tanggung jawab pendidikan
gawe ngambar -ruming nagri
pra guru tetep pahlawan
ambangun jiwaning murid

Senggakan 4
Rujak nanas pantes den wadhahi gelas
aja uwas siswa kudu bagas waras
Rujak kates pantes den wadhahi toples
aja nglewes dadi siswa kudu beres

Kinanthi 4
Pamungkasing atur ulun
nggen kula tur bagya puji
yen wonten kirang trapsila
miwah yen tan kasdu nggalih
nyuwun samodra aksama
kawula lumengser sami


LAGU JAMU-JAMU
Suwe ora jamu, jamu godhong pandhan
siswa karo guru eling dina Pendidikan

Suwe ora jamu, jamu godhong waru
kabeh siswa siswi nurut wulanganing guru

Suwe ora jamu, jamu godhong uwi
kabeh para guru tresna asih siswa siswi