Ketemu karo pangarsa basa Jawa.

     

            Ora ngira yeng anggonku  sesambungan karo mas Suharmono via facebook ,entuk tanggapan kang banget gawe leganing atiku. Malah aku diutus nyampurnakake lambang PPSJS , diwenehi kelir supaya luwih apik menarik . Pancen sing nyipta lambang mau aku tahun 70an, nalika PPJS dibiwarakake nalika semana kanthi sponsor tunggal alm bapak Suripan Sadi Hutomo.Wektu iku aku kuliah ing jurusan seni rupa IKIP Surabaya nganti lulus sarjana muda, nanging aku luwih ketarik marang basa Jawa.Malah nalika semana sawetara karanganku  awujud crita cekak kamot ing majalah Panyebar Semangat.

            Nanging embuh apa sebabe wiwit tahun 80 an kaya-kaya ora duwe krenteg nulis blas.Beja kemayangan ngancik tahun 2008, aku duwe kanca sing asmane pak Sugeng, sing miwiti aku blajar nulis maneh ana ing blog. Wiwit tahun mau aku sithik mbaka sithik nulis ing blogku sanajan mung” cowek , diwoco dhewek “.Aku biyen mlebu senirupa mung pawitan nggambar wayang, seni dekoratif. Dadi wulangan anyar kayata proyeksi, perspektif lan liya-liyane ya rada kecipuhan.

              Mbaleni bab aturku ditimbali mas Harmono.Tanggal 7 Maret 2014 kepungkur aku sida menyang DKS sing manggon ing dalan Pemuda Surabaya. Amarga bakal ketemu karo pangarsa basa Jawa, mula aku ngajak mitraku ya guruku pak Sugeng, sing wis tak aturke ing dhuwur.Senajan rada telat pungkasane ketemu karo Mas Suharmono sing siki wis kagungan gelar Doktor. Malah ora mung iku, aku malah ketemu Begawan basa Jawa, bapak Suparto Brata, ketemu pak Aming Aminudin, mbak Susi Partosudarmo, mas Joko, mas Widodo Basuki (red.pelaksana Jaya Baya), lan para pengurus PPJS sing anyar. Ing sapatemon mau mas Harmono ngendikan bab program kerja, kegiatan apa sing bisa ngangkat jenenge PPSJS lan liya-liyane.

            Udan nggawa kabegjan, yaiku ukara sing pantes dak tulis. Sanajan Surabaya digrujug udan , pranyata aweh barokah kang nglantarake aku bisa ketemu karo para pangarsa basa Jawa. Matur nuwun mas Harmono, sugeng nindakaken jejibahan , muga-muga basa Jawa tetep lestari nganti kukuting  jaman .Iki sawetara foto karo bapak Suparto Brata lan pak Aming lagi aksi.

SUGENG TINDAK BULIK

 1. Racake cah jaman saiki , gembleleng pethitha pethithi. rumangsa pintere kepati, wis ora ana sing nandhingi (dilagokake kaya  pepaya mangga pisang jambu ).

 2.Indonesia tanah air beta pusaka abadi nan jaya.......(lst)

3.Kucingku belang, beranak belang, berguling-guling …… (lst )

4.Teringat masa lalu , waktu ku disampingmu, memandang bulan terang….(lst).

5. Kembang anggrek wiwit thukul, aku eling nyang kowe, dhek nalika padha kumpul, dolanan, karo kowe ...........(lst)

                 Limang lagu mau sing paling dak apali nalika bulik Sri (rayine swargi ibuku ), isih sekolah SMP Taman Dewasa (TD)Lorok, kab Pacitan. Nalika samana tahun suwidakan, lan prastawa G30S PKI, durung dumadi.Aku kelas telu SR , lan bulik Sri kelas loro SMP.Saliyane wasis nyanyi bulikku uga wasis nglukis.Sing diremeni gambar pemandangan alam, diwarna nganggo cat air. Amarga tuku kuwas kangelan,  mula panjenengane ngasta kuwas dhewe saka remane. Remane dipotong pas pucuke sawetara cm, njur ditata neng sada ditaleni nganggo benang diemper kaya kuwas gawean toko. Ya kuwas made in piyambak mau, kanggo ngelir gambar sing wis dikonsep.

                 Yen sekolah mung tindak wae, amarga jaman samana pancen ora ana kendaraan.Pit wae arang-arang sing duwe.Amarga ndherek ibu, mula meh saben Sabtu aku ndherekake bulik kondur menyang Ketanggung, kec Sudimoro, kab Pacitan. Eyang kakungku dhewe sawijining Kepala Sekolah ing tlatah Ketanggung mau, kang wasis banget wulangan etung, saiki matematika. Kawasisane  Eyang Kakungku mau nurun marang adikku ragil kang saki dadi guru matematika ing SMP tlatah kab Pacitan.

                Waktu terus lumaku, aku mlebu SMP Negeri Lorok lan Bulik nerusake ana ing SPG Semarang , iya ndherek Bulik rayine ibu let siji. Asmane bulik mau ya padha nganggo Sri . Yen Bulik Semarang asmane Sri Mulyani, yen Bulikku Jakarta  sing ragil iki asmane Sri Mulyati.

Nalika aku SMP mau , bulik krama lan diboyong karo kakunge sing ngasta polisi ing Jakarta. Tau aku ya sowan mrana menyang Jakarta, nalika aku ngurus pengangkatan PNS, wektu semana daleme ana ing Jatinegara.

                 Ing wulan September 2010, aku nelpon bulik  kang intine ya riyayan kabar kaslametan lsp. Ora mung iku, malah bulik ngutus aku sowan menyang Jakarta. Wah ya ora dak bayangke senenge, amarga anakku  dhewe kepengin menyang Jakarta, malah ngajak numpak mobil disetiri dhewe. Klakon aku sida sowan nyang Jakarta, sing daleme wis pindah ana ing komplek Rafles Hill, Cibubur.

               Tahun 2011 aku ngeterke anak lanang sing nikah ing tlatah Bekasi. Ya ing wektu iku Bulik rawuh melu ngestreni anakku dadi manten, ora dak nyana iku pepanggihan sing pungkasan.

               Dina Rebo tanggal 26 Febr 2014, ana bel, saka adikku Pacitan kang banget ngagetake, yen bulik Sri seda. Aku setengah ora percaya , banjur  ngebel anakku, nanging ora dijawab, banjur ngebel mantuku, lan mantuku crita yen sisihane lagi tugas nyang Lampung, mungkin lagi sibuk. Genti  mas Hartono sing daleme Bekasi  putrane Budhe(isih sugengdaleme ing Bodag Panggul  Trenggalek ). Temenan mas Har ngendikan yen Bulik Sri pancen wis seda, mau awan jam siji, kanthi yuswa 66 tahun. Inna lillahi wa inna ilaihi Rojiun.

                 SUGENG TINDAK BULIK, MUGI PANGERAN PARING PANGAPUNTEN  SEDAYA KALEPATAN LAN DIPUN TAMPI SEDAYA AMALIPUN. AMIN YA RABBAL AL AMIN

LEREN SAWETARA SUPAYA LUWIH “jos”

Pegawean numpuk saben dina, ditambah ora kasil  ing target ora krasa yen kita kudu kemrungsung  nyambut gawe luwih abot maneh. Yen iki ditindakake terus-terusan ora mokal yen nambahi sesanggan lan panandhang. Ing ngisor iki ana sawetara cara nanging ora baku. Mangga !

Maca.

Yen ora kepengin maos sing abot, panjenengan bisa milih majalah tabloit utawa novel. Koberna maos, nanging ya kuwi, aja katrem olehe maos amarga bisa lali gawean.Panjenengan bisa maos sawetara menit  jroning padhete pegawean mau.

“Browsing”

Browsing internet  pancen ampuh tenan kanggo ngilangake rasa bosen. Ora mung “mengunjungi” situs warta, media sosial, utawa situs hobi, nalika ngakses internet, kerep wae kita nemokake ide anyar kang ana gandhenge karo pegawean kita. Nanging aja nganti kita ngakses internet mung kanggo update ing media sosial kang sifate pribadi. Ing internet akeh informasi penting kanggo pegawean kita.

Dolanan Games.

Kasengsem dolanan games pancen ora apik . Nanging , dolanan games jroning wektu tartamtu bisa agwe pikiran kita seger, lungkrahe awak bakal suda. Panjenengan  luwih siap kanggo ngepen  nerusake pegawean.

Ana apike yen panjenengan dolanan games sing ora nuntut nganti rampung games mau jroning wektu tartamtu, nanging milih games sing bisa dipause. Kanthi mangkono panjenengan bisa  bebas ngatur  wektu dolanan games.

Nglemesake otot.

Yen awak krasa kaku, panjenengan bisa  nindakake sawetara ngobahake awak kanggo ngenthengake pikiran. Upamane , tangan kekaro didadekne siji kaya nyembah didekek ing ndhuwur mustaka banjur diangkat mendhuwur lan didhunke alon-alon.Cara liya bisa lenggah kanthi jejeg, ngungalake dhadha lan ngendhokake kanthi alon. Liya saka iku panjenengan bisa ngobahake gulu ngiwa nengen  lan ditahan dhisik kanthi ngetung siji nganti lama.

Mlaku-mlaku.

Lenggah kanthi suwe pancen ora sehat. Panjenengan bisa mlaku-mlaku sawetara ing komplek lingkungan kantor. Iki pancen nyuda sayah, awak luwih sehat, pikiran seger lan luwih semangat.

Ngemil.

Mundhut wektu sing longgar kanggo ngunjuk kopi utawa teh karo dhahar camilan pancen  oke.Yen kepengin luwih sehat maneh, bisa ngunjuk jus lan ngemil woh-wohan gres.Kacang-kacangan bisa uga kanggo kanca ngemil . Jinis kacang almond sing sugih protein lan asam lemak pancen migunani kanggo awak.

Ngobrol.

Panjenengan koberke ngobrol karo mitra nyabut gawe. Guyon lan gojlog-gojlogan  pancen gawe swasana seneng  jroning numpuke pegawean , nanging aja nglantur, nganti lali gawean.Sacukupe wae.

Raup.

Pikiran bisa dadi seger nalika raup. Segere banyu  kaya-kaya bisa gawe kekuatan anyar ,mahanani  luwih semangat kanggo nyambut gawe.Kegiatan iki wis lumrah ditindakake dening sawetara wong kanggo nyuda kesele tumandang gawe. ( sumber,komps.26214 hl39, pjb ).

AJA LAMIS

Ciptaan : Ki Narto Sabdo

Aja sok gampang, janji wong manis
Yen ta amung lamis
Becik aluwung prasaja nimas,
Ora agawe cuwa

Tansah ngugemi tresnamu wingi
Jebul amung lamis
Kaya ngenteni thukuling jamur
Ing mangsa ketiga

Aku iki prasasat
Lara tan antuk jampi
Mbok aja amung lamis
Kang uwis dadine banjur dhidhis

Akeh tuladha kang demen cidra
Uripe rekasa
Milih sawiji ngendi kang suci
Tanggung bisa mukti

reff :

Aku iki prasasat
Lara tan antuk jampi
Mbok aja amung lamis
Kang uwis dadine banjur didis

Akeh tuladha kang demen cidra
Uripe rekasa
Milih sawiji ngendi kang suci
Tanggung bisa mukti

Menawi badhe mirengaken kula aturi klik wonten mriki.

Wiwit Aku Isih Bayi

Syair : - No Names.

Wiwit aku isih bayi,wong tuwa sing ngopeni
Nganti tumeka saiki, lair batin gemati.
Mangkat sekolah  aku disangoni,
Sandhang pangan wus mesthi.
Mula aku kudu ngerti,mbangun turut ngajeni.

Keparenga amba matur dhateng bapak lan ibu.
Nyuwun berkah lan pangestu, Amrih langgeng rahayu.
Atur panuwun mbo kekalih, Kinanthen sembah bekti.
Sageda nulad tresnanta, guyup rukun slaminya.

(sb kdjg)